Mae Llwybr Ystwyth yn agored i feicwyr, cerddwyr ac i geffylau. Mae’n 34km o hyd, a bydd yn cysylltu Aberystwyth a Thregaron. Mae’r llwybr yn brosiect Amcan 1 a fydd yn para am dair blynedd ac fe’i hariennir gan Gronfa Datblygu Rhanbarthol Ewropeaidd a Chronfa Adfywio Lleol Cyngor Sir Ceredigion, gyda chefnogaeth sefydliadau eraill megis Cyngor Cefn Gwlad Cymru, y Comisiwn Coedwigaeth, Dwr Cymru ac Awdurdod Datblygu Cymru.

Ar y cyfan, bydd yn llwybr oddi-ar y ffordd, a bydd yn defnyddio’r hen reilffordd, Hawliau Tramwy cyhoeddus a lonydd gwyrddion tawel. I ddweud y gwir, mae’r llwybr yn un hwylus dros ben, sy’n eich tywys ar daith hamddenol iawn drwy ardaloedd gwledig o harddwch neilltuol sy’n cynnwys dwy Warchodfa Natur Genedlaethol, Pendinas ger Aberystwyth a Chors Caron ger Tregaron a 10 erw o goedwigoedd collddail ger Trawscoed.

Trawsgoed: Llwybr Ystwyth: Ewch at yr Adran Llwybrau am fap manwl.

Y nod oedd creu llwybr a fyddai’n ddiogel ac yn hygyrch i feicwyr, cerddwyr, i bobl sy’n marchogaeth ac i bobl anabl. Yn y pen draw, bydd Llwybr Ystwyth yn rhan o Lwybr 81, Rhwydwaith Beicio Sustrans a Llwybr 2, rhwydwaith beicio strategol Ceredigion, sydd yn cysylltu â llwybrau eraill drwy’r sir (Gweler yr adran ‘Llwybrau’).

Pam aros? Ewch ar eich beic a dewch i ddarganfod Ceredigion!

Er mwyn gwneud eich profiad yn un bythgofiadwy, fe’ch anogir i chi brynu llyfryn Llwybr Ystwyth, sy’n amlinellu’r rhannau di-draffig gorau ar hyd y llwybr, sydd yn arbennig o addas ar gyfer teuluoedd â phlant bach a’r rheiny sy’n rhoi cynnig arni am y tro cyntaf. Mae mapiau hefyd ar gael ar gyfer Llwybr Rheidol a’r llwybrau gwyliau beicio am £6.49. Cewch gopi yn y rhan fwyaf o Ganolfannau Croeso.